Զարուհի Համբարձումյանը մշակութային մարդաբան է, ՀՀ ԳԱԱ Հնագիտության և ազգագրության ինստիտուտի Կիրառական ազգագրության բաժնի կրտսեր գիտաշխատող։ Բարձրագույն կրթությունը ստացել է Երևանի պետական համալսարանի Պատմության ֆակուլտետում՝ մասնագիտանալով Ազգագրության ամբիոնում։ Մասնակցել է ավելի քան 30 հետազոտական ծրագրերի, որոնք իրականացվել են ՀՀ ԳԱԱ Հնագիտության և ազգագրության ինստիտուտում և «Հազարաշեն» ազգաբանական հետազոտությունների հայկական կենտրոնում, որին նաև անդամակցում է։ Նրա հետազոտությունները ներառում են կրոնական փոքրամասնությունների, տոնական մշակույթի արդի փոխակերպումների, Հայոց ցեղասպանության ընտանեկան հիշողությունների, ժամանակակից կրոնական պրակտիկաների, սրբազան տարածքների և ուխտագնացությունների, ինչպես նաև ԽՍՀՄ քաղաքական բռնաճնշումների ուսումնասիրությունները։ 2021 թվականից զբաղվում է Արցախից բռնի տեղահանվածների մշակութային ինքնության, հիշողությունների և ավանդական մշակութային ժառանգության ուսումնասիրությամբ։ Հետազոտական գործունեությանը զուգահեռ Զարուհի Համբարձումյանը ներգրավված է կրթական նախաձեռնություններում, ներառյալ մարդու իրավունքների ոչ ֆորմալ կրթությունը և երիտասարդական բանավեճային ծրագրերը։ Նրա միջդիսցիպլինար մոտեցումը միավորում է մշակութային մարդաբանությունը, հիշողության ուսումնասիրությունները և կրթությունը՝ կենտրոնանալով մշակութային հիշողության պահպանման և փոխանցման վրա, հատկապես տեղահանված և մարգինալացված համայնքների շրջանում։