ՀԵՏԱԶՈՏՈՒԹՅՈՒՆ
Արցախյան ճգնաժամ և հիշողություն․ տեղահանություն և ինտեգրացիա
Նախագիծը նպատակ ունի զարգացնել հիշողության և ճգնաժամերի ուսումնասիրման միջգիտակարգային և քննական մոտեցումները՝ հիմնվելով բանավոր պատմության մեթոդաբանության և թվային արխիվացման գործիքների վրա։ Հետազոտության թիրախում են բազմակի և համաժամանակյա ճգնաժամերը արցախյան համատեքստում՝ համավարակ, պատերազմներ, շրջափակում, հարկադիր տեղահանություն, հետտեղահանային ինտեգրում, ինչպես նաև տեղահանության ազդեցությունը ընդունող համայնքների սոցիալ-մշակութային կյանքի վրա։
Հետազոտական տիրույթներ
Մեր ուսումնասիրության առանցքում հիշողության և ճգնաժամերի վերաբերյալ հետազոտություններն են, որոնք իրականացվում են համակարգված դաշտային աշխատանքի և թվային արխիվացման միջոցով՝ սահմանելով ոլորտի մասնագիտական և էթիկական չափորոշիչներ։
Դաշտային հետազոտություն եվ թվային արխիվացում
Դաշտային նյութերի համակարգված գրանցում
-Բազմատեղային դաշտային ազգագրական հետազոտությունների և բանավոր պատմության կիսակառուցվածքային հարցազրույցների իրականացում՝ ճգնաժամերի տարաբնույթ փորձառությունները և համայնքների վրա դրանց տևական ազդեցությունը վերհանելու նպատակով։
-Խոսքի թվայնացման և ձայնից-տեքստ համադրման մեթոդների կիրառությամբ բանավոր պատմությունների մշակման և վերլուծության բարելավում։
-Թվային շտեմարանի ստեղծում՝ զգայուն նյութերի կանոնակարգված հասանելիությամբ։
Մասնագիտական չափորոշիչներ
Էթիկական և իրավական շրջանակներ
-Էթիկական նորմերի և իրավական կայուն մեխանիզմների մշակում, որոնք ապահովում են տեղեկացված համաձայնության, հեղինակային իրավունքի և գաղտնիության պաշտպանությունը՝ երաշխավորելով բանավոր պատմությունների պատասխանատու կառավարումը և քննական վերլուծությունը։
Հետազոտական արդյունք եվ գիտելիքի տարածում
Տեսական շրջանակներ և վերլուծություն
-Սոցիալական փոխակերպումների հայեցակարգային ընկալման զարգացում՝ տեսական շրջանակների և դաշտային նյութերի քննական վերլուծության համադրման միջոցով։
-Գիտական հրատարակություններ՝ գրախոսվող գիտական աշխատանքների հրատարակություն՝ հիշողության, ինքնության և հարակից սոցիալ-մշակութային երևույթների փոխակերպումների շուրջ։
Հետազոտական մեթոդաբանություն
Տարբեր որակական մեթոդների կիրառում՝ ուղղված ճգնաժամային իրավիճակներում մարդկային փորձառությունների և հիշողության ուսումնասիրությանը։
Բանավոր պատմություն
Անհատական խորքային պատումների և կենսագրական պատմությունների գրանցում՝ ճգնաժամերի և տեղահանությունների մարդկային չափումը վերհանելու նպատակով։
Փորձագիտական հարցազրույցներ
Ճգնաժամերի ինստիտուցիոնալ արձագանքների և հիշողության կառավարման մեխանիզմների վերլուծություն՝ փորձագետների և հիմնական շահակիցների հետ հարցազրույցների միջոցով։
Մտային քարտեզագրում
Ճգնաժամի և հիշողության սուբյեկտիվ աշխարհագրությունների ու սոցիալ-տարածական չափումների քարտեզագրում։
Խմբային հարցազրույցներ
Խմբային քննարկումների իրականացում՝ հետազոտելու, թե ինչպես են թիրախային խմբերը դիմագրավում ճգնաժամի, տեղահանության և սոցիալական ինտեգրման փոխկապակցված մարտահրավերներին։