Ճգնաժամ եվ հիշողություն

ՀՀ ԳԱԱ Հնագիտության և ազգագրության ինստիտուտում տարբեր հետազոտական թիմերի կողմից իրականացվել են մի շարք հետազոտություններ՝ ճգնաժամի և հիշողության խնդիրների շուրջ։ Արդյունքում կուտակվել է մեծածավալ հետազոտական նյութ, որը պահանջում է համակարգրված պահպանում, թվայնացում և թվանշային գործիքակազմով մշակում՝ էթիկական և իրավական նորմերի ապահովմամբ։ Նախագծի իրականացնող թիմը, կարևորելով հավաքված նյութերի մեկտեղումը կայուն ինստիտուցիոնալ միավորի շրջանակում, նախաձեռնեց թվանշային բանավոր պատմությունների շտեմարանի ստեղծումը։ Այս գաղափարի իրականացումը հնարավոր դարձավ ՀՀ ԿԳՄՍ նախարարության Բարձրագույն կրթության և գիտության կոմիտեի «Adjunct Research Professorship Program 2025» («Հեռավար լաբորատորիա») ծրագրի շրջանակում «Ճգնաժամ և հիշողություն․ թվանշային բանավոր պատմությունների լաբորատորիա» նախագծի (25RL-6A038) հիմնադրման միջոցով։ Լաբորատորիան, սակայն, չի սահմանափակվելու միայն շտեմարանի ստեղծմամբ, այն կնպաստի բանավոր պատմության մեթոդաբանությամբ հետազոտական կարողությունների զարգացմանը՝ աշխատարանների, սեմինարների, ամենամյա դասընթացների, դաշտային աշխատանքների միջոցով։ Նախատեսում ենք նաև դաշտային նյութերի հավաքման, պահպանման և օգտագործման իրավական և էթիկական մոտեցումների մշակում և կիրառում։ Նախագիծը խթանում է ճգնաժամերի և հիշողության ուսումնասիրման միջգիտակարգային մոտեցումը՝ համադրելով մարդաբանական, լեզվաբանական հետազոտությունները և թվանշային տեխնոլոգիաների ընձեռած արդի հնարավորությունները։